مطبخ سوريا الناس ” المحاشي ” ..

اليوم بدنا نئدم الكن أكلة الاغلب بحبها وهي ” المحاشي ” مع الصور

المقادير ..

2/ كيلو كوسا.. 2 / بادنجان

800 / غرام رز اميركي  .. 1/2  كيلو لحمة مفرومة .. معلئتين سمنة ..  و بهار .. و ملح .. حسب الرغبة .. 5 ملاعق رُب البندورة .. 2 ملعقة نعنع يابس .. 5 فصوص توم .. 2 ملعقة حمض ليمون ..او بتئدرو تستعيضو عنها بعصير ليمون حسب الرغبة

طريقة التحضير ..

بنغسل الكوسا والبيتنجان.. و بعدها بنحفر الكوسا والبيتنجان بالمحفرة . و بنغسل قلب الكوسا والبيتنجان مشان بقايا الناتجة عن الحفر

و هلأ طريقة تحضير الحشوة ..

نغسل كمية الرز المذكورة اعلاه بالمي منيح حتى ما يضل نشا بالرز و بعدها بنحط الملح والبهار على الرز و نضيف كمية السمنة  و اللحمة .. و بنحط ملعئتين رب بندورة  و بعدها بنحركن منيح و طبعا ماننسى انو ندوق الملح يمكن يكون بدو ملح كمان .. وهيك بتكون الحشوة جاهزة  رح نحشي الكوسا والبيتنجان مع مراعاة انو ما نخلي الحبة مليان حشوة لازم تكون نائصة حبة الكوسا او البيتنجان عئدتين اصبع

و بعد ما نخلص الحشي بنحط بأرض الطنجرة عصاعيص او لحمة بعضمها  و بنطبق فوقهم المحاشي بشكل مرتب

993058_144873942376474_843856004_n

وهون رح نعمل الصلصة يلي رح نضيفها على المحاشي ..

نهرس كمية التوم و بنضيف عليها النعنع اليابس و حمض الليمون وبنجيب كمية مي و بنحط فوقها رب البندورة وبندوبها منيح و بنضيف عليها التوم والنعنع وحمض الليمون و بنحط هي الصلصة فوق المحاشي  و بنحاول انو نسكر اخر طبقة من المحاشي بصينية رئيئة او فخارة خاصة للمحاشي و بنحطها على النار وبس تغلي الصلصة بندوق الملح والحمض و اذا كان تمام بنهدي النار تحت المحاشي  لمدة ساعة لـ ساعة وربع

و بعدها بنرفع المحاشي من المرقة و صحتين وهنا .. وفيكن تقدمو معو خضروات متل النعنع الاخضر والفجل والفليفلة خضرا حارة او فليفلة حمرا و كمان اذا بتحبو اللبن فيكن تضيفو عليه فص واحد توم و رشة نعنع يابس كتير شهي وطيب مع المحاشي

و هي صورة معبرة عن اكلة المحاشي يارب تعجبكم 🙂

8617_144873052376563_686547406_n7459_144874115709790_1393926358_n

تعليق واحد

  1. يعني اشوف وما اكل 🙁
    الله يسامحكن بس 🙁
    🙁
    🙁
    🙁
    الله يطعميني منهم يارب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *